08.08.2016-nə
tarıxədə ətrofə rayonono, hətta Boku, Sumqayıt şəhrono Azərboyconi kali
ruşinfikon Masalli şəhrədə bə 70 sinninə
şair, ədəbiyotşınos, tənqidəvon Allahverdi Bayrami rüşnə qırdə ben. Həmən, bı
nezono çəy Boku şəhri “Ecoprint” nəşriyoti mətbəədə çap bə “ Sellər kimi çağlar könül” (B-2016) kitobi təğdimati
dəvonişone.
Masalli
“Göy qurşağı” (“Nənə hanə”) ədəbi məclisi üzvon tərəfo ədəbi- bədii tədbir hozo
kardə bəbe. Da rüj bənavo ın tədbiri çok dəvonero, veyə zəhmət kəşə Tolışi
piraniyə şair Xanəli Tolış sıftəko tosbə oxoy bı mərasimi sədrəti kardışe. Tədbirədə,
əsosən, çı Bayrami bı kitobədə jimoni iyən ofəyəvoni həxədə nıvıştəbə 17 nəfər
sənətkon, ıştən iyən düst-həmron, ədəbi
məclisi üzvon: şairon, nasiron, jurnaliston iştirok kardedəbin. Mərasim saat
10-də bino be, 3 saat dəvom kardışe.
X. Tolış dıştə navsıxani A. Bayrami şəxsiyəti,
ictimai fəaliyəti, ədəbi ofəyəvonəti barədə kırtə qəp jəşe:
-Bayrami
ım rüj moəo bə, (08.08.1946) Mədo məktəb (1965) BDU filoloqiya (1970) oroxniyəşe.
Ostoro iyən Masalli rayonono 41 sor müəlim ko kardəşe (1970-2011). Tələbə
devriku tosə ısə dı bədii-elmi ofəyəvonəti dastkoye. Im rüj çəy 12-nə kitobi
edaştemoni iyən çəy 70 sinnə yubileyi dəvonero iyo qırdə bəmon.
Peşo bə A.Bayrami sıxan doşone ki, kitobi barədə
qəp bıjəno. Bayrami ıştə nıtqədə votışe:
-“Sellər kimi çağlar könül” kitobədə, oroxnə 3-4 sorədə, ıştə həm bə tırki, həm bə tolışi nıvıştə bə məğalon,
bardə müsahibon iyən publisistə nıvıştəyonım dərc kardə. Çəmə tolışə xəlği ruf
Əli Nasir (2), piraniyə şairon Xanəli Tolış (1) , Cabir Nəsir(1), Əbdulrza Əhmədov(2),
Baləddin Veşo (2), Şahmerzə Tolışəxun (1), Əvəz Nəbi (1), Nəriman Tolışi (1)
Camal Lələzoə (1), cıvonə bınıvışt Vüqar Mirzəzadə (Həmati) (2) ofəyəvoni barədə otırnəyon (elmi məqaləon) kitobi iminə poədə
dərc bıə. 2-nə poədə dı 7 sənətko bardə musahibon vırə qətəşone. (Çımı müsahibon 86 sinninə şair-pedaqoq Əbdulrza Əhmədov, Azərboyconi
həmən Tolışi ım rüjnə talantinə şairon Nəriman
Tolışi, Baləddin Veşo, Xanəli Tolış bən.) Kitobi 3-nə hissədə “Y” morfemi, “Çe”
navsıxani həxədə çımı mülahizon, Xudaşirin Cabbarlı şəxsiyət, 100 sinninə seyid
Həzər Bağırovi xıyzoni, Tolışi bılbıl, muğənni İsrail Məmmədovi, Tofiq
Nicoti... həxədə nıvıştəyonım dərc bən.
Bayrami ıştə nıtqədə bə 2-3 məsələ işarə
kardışe:
1) Jimonədə həm ıştən dı şeer-sənəti dastko bəm,
həmən bəştə şoqirdon nıvışte sıron omutəme. İqlə qeyd bıkəm: Fəxr kardəm ki, Azərboyconi
ım rüjnə ədəbiyoti ən ğüdrətinə, talantinə şair Mehmon Qaraxanizoə çımı perosnə
şoqirde.
2) Sıftəku şeer nıvıştəme, həmən co nıvıştəkəson
şeeron, ofəyəvonon təhlil kardəme, bə ədəbiyotşünosi tojə toyfonom doə. Çımı
elmi məğalonədə ibarət 4 qılə kitob hestıme: “Ötən günlərin işığında” B-2007, 186
səh.), “Qəncinəti əndozə” (B-2008, 196 səh.), “Azərboyconi tolışon ədəbiyot”
(B-2013. 293 səh.), nəhayət, ım kitob - “Sellər kimi çağlar könül” (B-2016.
164 səh.).
3) 2005-nə soriko jıqo həm ıştə kitobon, həmən
şairə-nasirə həmron kitobon bə nəşr hozı kardedəm. Mərhum Bəhmən Salayevi 4 qılə
kitob, Xanəli Tolışi 5 qılə kitob, Camal lələzoə 4 qılə kitob, Əhməd Səmədovi,
Cabbar Əliyevi, Cabir Nəsirovi, Bağır Bağırovi, Səxavət Qafarlı, Balamirzə Cəfərli,
Şirzad Ağayevi, Beytulla Şərifzodə iyən çan sənətkoon kitobon həm redaktor bəm,
həm bə çap hozo kardəme.
4) Bənə İlqar Yusifli, Məmməd Ağa, Balamirzə Cəfərli
ve cıvonə bınıvışton bən, əmmo bənə həqiqi şairi əvon iyo, çəmə Masalli ədəbi məclisədə
püxtə bən. Xanəli Tolışi, Rafiq Məmmədi, iyən dıçımı hıkmi-təbi əvon
kitobxıvand bən, bənə çokə şairi məşhur bən.
5) Kali tolışon şikat kardən ki, hükümət bə Azərbaycanədə
jiyə etnik xalqon dığət nüşo doydəni. Guya, Multukulturalizm Onemon bə çəşi puş
şodoyro soxtə bə. Dıminə sin dəşə ın
Onemon, dıştə sıftənə tədbiron nəzə cəlb kardedə. Çəy tədbirono tolışonən bəhrə
səydən. Məsələn, almani alim Fridrix Henri fon Dits 1815-nə sori “Dədə Qorqud
dastonon” qələyni “ Basati Kəlləçəşi kışde”
dı Homeri Siklopon müqayisə kardedə. Çı məqaləko 300 sor dəvarde qeyd
karde barədə çəmə Prezidenti sərəncom doəşe. Im daston də almani alimi məqalənə
ico Azərboyconədə jiyə 26 etnik xəlği zıvonədə çap be. Çə zıvononədə qıləyən
tolışi zıvonbe. Mı dı Mehmon Qaraxanizoə həminə kitobımon hozo karde (B-2015,
80 səh.). Ədəbi ictimaiyəti zınəşe ki, az “Dədə Qorqud”i bə tolışi tərcümə
kardedəm, təqdir kardışone, mıko müsahibon peğətışone. Çımı həxədə də münasibəti
çan mətbu orqanon məğalon doşone. Multukulturalizm idarə tojə, nübədə bə lahiyədə
ijən tolışon bəhrə bardedən: “Reqion” nomədə bə “Multuralizm” jurnali əlovə nəşr
bedə, iminə vırə bə tolışon doə bə. 36
tolışə şairi həxədə məlumat dəçəvon 3-4 şeiri iyo dərc bəbe.
70 sinnə Bayrami həxədə iyo iştirak kardə kəson
ıştə dıli sıxanon votışone.
Yubilyari
tələbə həmro şair Əvəz Nəbi:
- Tələbə bimon, əmə bə nəve, bə kino əşimon.
Əncəx çı Bayrami şə vırə kitobxonon, tələbə elmi cəmiyəton iyən ədəbi-bədii tədbiron
bin. Ənışti, maştə tosə şanqovə həm boştə,
həm bo tələbə həmron kursə, kontrolə
koon ənıvışti. Im zirəkəti ısətən çəşi vədəye. 12 kitobi xıvande, çımı i
qılə kitob çap be, həyo-abrüm şe, dəyən çe həvəsi qınim.
Bayrami müalicə həkim-jurnalist Xodaşirin Cabbarlı:
- Ədəbi məclisi iclasonədə oşnə bimon: vindıme
hartərəfinə şəxsiyəte: ərəbi-farsi çok zınedə, həmən çok qıləy ruhaniye: məşhədi,
kərbəlayi nomi dıştə sofəti-pokəti novnedə, müdrikə-dindorə insone.
Ədəbi məclisi həmsədr şair-publisist Rafiq Məmməd:
-Titulinə şairon, elmon doktoron veyn, əmmo, əvon
çı Allahvardi Bayrami kardəyon nimdiki nimə kardəşonni. Bayrami çəmə həqiqi
nomdorə şair, elmi sahədə akademike.
Şair, yubilyari düst-həmro Məmmədşah Mirzə:
- 2008-nə sori rayoni Tüklə məktəbədə çımı
“İnam işığında” kitobi edaştemon dəvonə bedəbe. Bə Bayrami aspardəmbe ki, çımı
kitobi həxədə məruzə bıkəo. Məclidədə rəyoni rəhbər nümayəndon, təhsil şobə koəkon
iştirok kardəbin. Bayrami bə çımı ofəyəvonəti, bə çımı poeziya qıləy təhlil
doşe, müəlimə həmron, mehmonon, çımı şoqirdon heyron mandin. Həmonə təhlil dı
ixtisori, çı rəyoni “Çağırış” qəzetədə, “Azərboycon müəllimi” respublikə qəzetədə
çap be. Əmmo, Bayrami həmin məğaləş bı kitobədə tam şikilədə dərc kardə. Hejo çə
məqalə nomış doə bəştə bı elmiyə kitobi: “Sellər kimi çağlar könül”. Im sıxanon
bəmı aidin. Çəy bəmı doə bədii tarife.
İstedadinə şair, çokə nasir, publisist Camal
Lələzoə:
- 70-nə soronku dı Bayrami ofəyəvonə düstəti
kardəmon. Çımı çan kitobon redaktor Bayrami bə. Redaktə iyən korrektədə çəy
misliş ni. Hartərəfinə zınemon, qeşə dınyozınəti çı ofəyəmonə şəxsi barizə xosiyəte.
Şair-təbib Balamirzə Cəfərli:
-Dırozə müddət orduədə xıdmət kardəme. Hejo
nıvıştəbim, hətta çımı şeeron, miniaturon, esseyon mətbuatədə dərc bedəbin. Qarabağı
daveədə qonə yarə səme, bə mina eqınim. Tərxis bem, oməym bə rəyon, Masalli ədəbi
məclisi iclasonədə iştirak kardıme. İyo omutıme ki, həqiqi şeer çı cur bebə.
Rafiqi, mərhum Səxavəti, Xanəli, məxsusən
Bayrami qayğüon mınışon şair karde.
Piraniyə pedaqoq-jurnalist Bağır Coşqun:
- Az ixtisaso jurnalistim. “Yeni həyat” rayoni
qəzetədə ko kardeyədə, “Poeziya” dərnəqi məşğələnodə bənə cıvonə şairi Bayrami
rə-rə əvındim. Peşo 12 sor təhsil şobədə inspektor ko kardıme. Bayrami vindəme,
bənə çokə pedaqoqi muşahidə kardəme.
“Tolışi sədo” qəzetiro məqaləon hozo kardeyədə Bayramim bənə superə pedaktori
vinde. Çımı ofəyəvoni barədə 200 səyfəo ibarət qıləy kitob tərtib kardəşe. Bayrami
ve zirəkə, məhsuldorə, ofəyədorə insone.
Çımi bəpeşo sıxan bə cıvonə şair Vüqar Həmati
doə be. Əy, ıştə nomo iyən çı “Aləm” jurnali heyəti nomo Allahverdi müəlimış təbrik
karde, çı ustod Allahverdi Bayrami həxədə
ıştə fikonış vote:
-Iştə iminə kitobi “Həyf çə rüjon” kitobi çap karde piyəme. Fik kardedəbim ki,
çımı cı kitobi redaktor ki bıbu?! Bəmı votışone ki, ən çokə redaktor Bayramiye.
Əv ısə Mərdəkonədə istirahətədəy. Şem bə Mərdəkon, iyo bənə Xanəli, Məşriği,
Bayrami çokə insonon rast oməym. Dəçəvon koməğətinə, məsləhətonnə, çımı kitob
çap be. Peşo çımı dıminə kitob “Xasay nəsli salnomə” dı Bayrami redaktə iyən dəçəy vəsə sıxani çap
be. “Honi çəşmə” nomədə qıləy vocibə kitobımon dı Bayraminə ico tərtib karde.
(285 səhifəynə 54 tolışə şairi əğılə şeiron məcmuə). Isətən hozo bedəmon ki,
“Azərboyconi tolışi şairon” antoloqiya tərtib bıkəmon. Allahverdi müəlimi bo
tolışi ədəbiyati, mədəniyəti inkişafiro kardə koon həmə çəmə çaşi navədən. Əmə
ve hərəbaxtə şairimon, ənıvıştimon ki, çəmə səyku, çəmə tono bənə Allaverdi müəlimi
müdrik, səvodin, arif, aqil, sipriş heste.
İyən co kəson Bayrami həxədə ətrofin sıxan
kardışone.
08-09
avqust, 2016
Masalli-Boku.
“ALƏM” N:
1 (1) 2016
Hiç yorum yok:
Yorum Gönder